«РУХАНИ ЖАҢҒЫРУ – ОЙ САНАНЫҢ КЕМЕЛДЕНУІ»

Рухани жаңғыру – бабалардан бойға сіңген дәстүрдің, әдет пен ғұрыптың, салт пен сананың, ырым мен тыйымның, ұлттық болмыс пен ұлттық құндылықтардың қайта өрлеу кезеңі.  Яғни қазіргі заман талабына сай мәдениеттің жаңаша бағытта қалыптасуы. Себебі кез келген күштің дәрежесі бірлікте. Ендеше рухани жаңғырудың тағы бір қыры елді бірлік пен татулыққа шақыру. Қарабайыр қарым-қатынас үшін шақыру емес, бәсекелес болуға, елдің ертеңі үшін бірігуге шақыру. Қаражар ауылы мен Қосарал аулының ауыл жастары мен мектеп оқушыларының арасында патриоттық тәрбие беру, туған жердің салт - дәстүрін, мәдениетін, төл тарихын құрметтеу, ауызбіршілікке, ынтымаққа, бірлікке шақыру және «Рухани жаңғыру» жобасы аясында атқарылып жатқан іс шаралар баршылық.

Қаражар орта мектебі мен Қосарал негізгі мектебіннің  ұстаздары мен мектеп оқушылары және ауыл жастары  арасында ұлттық ойын түрлері көкпар, аударыспақ, теңге алу, жамбы атудан жыл сайын дәстүрлі түрде аудан көлемінде жарыстар ұйымдастырылып өткізіліп келеді.  Жалпы бұл жарыстың мақсаты атадан балаға мирас болып келе жатқан ұлттық ойындарымызды ұлықтау, мәртебесін көтеру болып табылады.  Көкпар тартып, ат үстінде аударысқан жас жігіттердің соңынан атқа мінер жас палуандардың қатары көбейіп келеді.  Олар ат үстінде ойналатын ұлттық ойын түрлерінің қыр сырларын тереңірек үйрену мақсатында көптеген жаттығу түрлерімен айналысады. Атқа мініп көкпар тартып, аударыспаққа шығып, садақ атуды әдетке айналдырып алған.  Әр жыл сайын Наурыз мерекесіне орай ауылда ұлттық ойын түрлерінен кең көлемде жарыстар ұйымдастырылып өткізіледі. Қатысушылардың делебесін қоздырған бұл шарада ұлттық ойын түрлерінің барлығы қамтылады. Ауыл ішінде ұлттық ойын салтанат құрып, мәртебесі артып, мерейі бір үстем болады.  Қарқынды дамып, тамырына нәр барған ұлттық ойынымыз тағы бір мәрте санамызда рухани түрде жаңғырады.

Айта кету керек ұлттық ойындарға ауыл жастары, мектеп оқушылары өз ұйымшылдықтарын, белсенділіктерін жоғары деңгейде таныта біледі. Ынта мен белсенділіктері жоғары. Оны қазіргі таңда анық аңғаруға болады.

Атадан балаға мирас болып жалғасып келе жатқан ұлттық ойындарды дамыту керек -деген ауыл тұрғындарының тілектері де бар.

Дана халқымызда «Көш жүре түзеледі» - деген қанатты сөз баршамызға белгілі.

Ұлттық ойын ауылымызда біраз уақыт бұрын бастау алып, осы күнге дейін жалғасын тауып келеді.  Осылай ақырындап басталған ұлттық ойын түрлері бір күндері Қаражар ауылында, Қосарал ауылында да  кең көлемде дами отырып, өз мәртебесін өсіретініне де сеніміміз жоқ емес. Барлығы ауылдан шығады.

Өйткені ат жалын тартып мінер балақай, асығын алшысынан түсірер жеткіншек, алысқанын алып ұрар палуан да, ат үстінде арпалысқан білектілер, көкпар шабар жігіттер барлығы да осы ауылда бар екенін айтқымыз келді. Ауыл жастарына әрдайым тек бірлікте, ынтымақта болуларына  тілектестігімізді білдіреміз.

Төлеген Айбергенов ағамыз айтқандай: «Бала кезден тартып мінсең ат жалын, онда сенің көкірегің от жалын» - деген сөзінен қазақпен жылқыны байланыстыра, егіз ұғым етіп көрсеткенін осыдан – ақ білуге болады.

Жем өзенінің жағасынан қоныс тепкен, төскейде төрт түлік мал өргізген, атқан таң мен батқан күнді адал еңбекпен өткізген, ынтымақ пен татулықтың ақ туын биік ұстаған Қаражар ауылы мен Қосарал ауылы  міне осындай… Ұлттық ойын – ұлт қуаты…

Байғанин ауданының білім бөлімі әдістемелік

 кабинет меңгерушісі Онгаров Беркайыр Шуйшбекович